Дастаи наврасони Тоҷикистон (U-16) дар доираи омодагӣ ба марҳилаи интихобии Ҷоми Осиё-2025 таҳти роҳбарии Далер Каёсов дар мусобиқаи анъанавии байналмилалии «Ҷоми рушд-2024» дар шаҳри Минск ширкат кард.
Дар марҳилаи гурӯҳии мусобиқот мунтахаби Тоҷикистон (U-16) се бозӣ анҷом дода, аз тимҳои Беларус (0:3), Русия (1:6) ва Қазоқистон (0:2) шикаст хӯрд. Имрӯз дастаи Далер Каёсов дар бозӣ барои ҷойи ҳафтум бар тими наврасони Озарбойҷон бо ҳисоби 3:1 пирӯз шуда, мусобиқаро бо пирӯзӣ ҷамъбаст намуд.
Дар бозии ҳалкунандаи «Ҷоми рушд-2024» шоми имрӯз дастаҳои наврасони то 17-солаи Беларус ва Русия бо ҳам вомехӯранд.