Ҳамлагари дастаи “Истиқлол” - Манучеҳр Ҷалилов муаллифи беҳтарин гол ва бозингари беҳтарини давр интихоб гардид.
Голи дуюми дастаи “Истиқлол” ба дарвозаи “Душанбе-83” аз сӯи ҳамлагари мазкур бо услуби хоси зарбазанӣ иҷро шуд. Ҳатто сомонаҳои расмии варзишӣ дар ҷаҳон аз голи ӯ истиқбол карданд. Cомонаи championat.com навиштааст, ки голи зебо бо усули акробатикӣ дар Чемпионати Тоҷикистон зада шуд.
Машҳуртарин сомонаи дигари русии sports.ru бошад, чунин нигоштааст: “Аз ҳама голҳои зебо ҳоло дар Тоҷикистон зада шуд. Ба ин зарба назар кунед, ки дар бозӣ миёни “Душанбе-83” ва “Истиқлол” зада шуд.
Ёдовар бояд шуд, ки Манучеҳр Ҷалилов инчунин бо хет-трикаш беҳтарин футболбози давр гардид.
Ҳамчунин шабакаи "Варзиш" бо такя ба назару андешаҳои шореҳони футбол ҳайати рамзии даври якуми мусобиқаро низ муайян карданд. Ба ҳайат 11-бозингари беҳтарини давр шомил гардиданд.
Се футболбози бошгоҳи “Истиқлол” – Табрези Давлатмир (дифоъгар), Искандар Ҷалилов (дифоъгар) ва Манучеҳр Ҷалилов (ҳамлавар) ба дастаи рамзии даври аввал шомил гардиданд. Футболбозони “Истиқлол” дар даври 1-уми чемпионат дар дербии шаҳри Душанбе тими “Душанбе-83”-ро бо натиҷаи бузурги 7:0 шикаст доданд.
Ду футболбози дигар бошад, аз тими навкори Чемпионат ё худ “Локомотив-Помир” - Шоҳрух Қирғизбоев (дарвозабон) ва Шаҳром Сулаймонов (ҳамлавар) шомил шуданд. Дар даври аввал футболбозони шаҳри Душанбе бо тими “Файзканд”-и ноҳияи Восеъ майдондорӣ намуданд, ки бозии мазкур бо натиҷаи мусовии 2:2 хотима ёфт. Дар ин дидор Шаҳром Сулаймонов бо як голи зебояш шомили ҳайати мо гардид.
Ду бозигари дигар - Андрей Сидоров (ҳамлавар) ва Хуршед Бекназаров (дифоъгар) аз тими “Хуҷанд” шомил шуданд. Дар даври аввал “Хуҷанд” дастаи "КМВА"-ро бо ҳисоби 3:1 мағлуб намуд.
Кароматулло Саидов (Хатлон), Артём Гайдаш (КМВА) ва Ҳоҷиакбар Узуқов “Регар-ТадАЗ” низ бо бозии зебои худ шомили ҳайати мо гардиданд.
Ҳайати эҷодии Телевизиони "Варзиш" тавассути барномаи ҷадиди “90 дақиқа”, ки шореҳи футбол - Бобо Холмуродзода онро таҳия месозад, охири ҳар моҳ ҳамчунин беҳтаринҳои футболи тоҷик, азҷумла бозигарону мураббиён низ муайян мешавад.