Роҳбарияти бошгоҳи лондонии “Тоттенҳем” омодаанд то ҳамаи чораҳоро оиди баргаштани Почеттино ба ин даста андешанд – менигорад хабаргузории The Independent. Алҳол мутахассиси 49 – солаи аргентинӣ Маурисио Почеттино дар вазифаи сармураббии дастаи фаронсавии “Пари Сен-Жермен” фаъолият дорад.
Тибқи маълумоти хабаргузории номбурда, сабаби баргардондани ӯро роҳбарони бошгоҳ дар рафтани ҳамлавари машҳури ин даста Ҳарри Кейн мебинанд, ки қасди тарки ин бошгоҳро дорад. Дар сурати бозгашти Маурисио ба даста, метавонад Кейн тасмимашро иваз кунад. Худи Почеттино дар айни замон оиди аз “ПСЖ” рафтанаш ва ё идомаи кораш дар ин бошгоҳи парижӣ чизе нагуфтааст, он ҳам дар ҳоле, ки даста имсол на дар Лигаи қаҳрамонҳо муваффақ гашту на ҳатто қаҳрамони футболи Фаронса гашт. Ин мушкилиҳои ҷойдоштаи “ПСЖ” метавонад сабаби баргаштанаш ба Англия шаванд ва дар сурати баргаштанаш низ мухлисони “Тоттенҳем” ҳам метавонанд ором шаванд, чун аз натиҷаҳои ин даста дар мавсими имсола норозианд.
Почеттино дар солҳои 2014-2019 сармураббии ин дастаи лондонӣ буда, қабл аз он дастаҳои “Саутгемптон” ва Эспанйол”-ро тамрин медод. Бо “Тоттенҳем” мутахассиси аргентинӣ то финали Лигаи қаҳрамонҳои Аврупо ва Ҷоми Лигаи Англия расида буд.