Дишаб дар Лигаи Аврупо бошгоҳи “Манчестер Юнайтед” дар 55 соли охир калонтарин ғалабаи худро дар мусобиқоти аврупоӣ ба даст овард. Девҳои сурх бори охир 12-уми майи соли 1965 дар даври ¼ ниҳоии як мусобиқоти аврупоӣ бо ҳисоби бузург тими “Страсбург”-и Фаронсаро шикаст дода буданд. Ин аввалин вохӯрии дастаҳо дар доираи мусобиқаҳои аврупоӣ буд. Дар бозии нахустини даври 1/8 ниҳоии Лигаи Аврупо дастаи “Манчестер Юнайтед” дар сафар тими “ЛАСК”-и Австрияро шикаст дод. Бозӣ бо ҳисоби 5:0 ба фоидаи меҳмонон ҷамъбаст шуд. Одион Игало (28), Даниэл Ҷеймс (58), Хуан Мата (82), Мейсон Гирнвуд (90+2) ва Андреас Перейра (90+3) муаллифи голҳои меҳмонон шуданд. Вохӯрии ҷавобии дастаҳо 20-уми март дар “Олд Траффорд” сурат мегирад.