Дастаи «Истиқлол»-и Душанбе, ҷамъомади таълимию тамринии худро дар Туркия ба аныом расионид.
Дар доираи омодагӣ ба мавсими нави футбол, қаҳрамони бисёркаратаи Тоҷикистон ҷаҳор дидори санҷишӣ анҷом дод. Бозии чаҳорум ва ниҳоии санҷиширо рӯзи 3-юми март бо бошгоҳи «Новосибириск»-и Русия баргузор кард. Ин бозӣ, ки дар майдони футболи маҷмааи варзишии «Папиллон»-и шаҳри Белек баргузор шуд, бо пирӯзии русиягиҳо бо ҳисоби 1:0 анҷом пазируфт.
Ёдовар мешавем, «Истиқлол» дар аввалин бозии санҷишӣ аз тими “Металлист”-и Харков, пешсафи дивизиони аввали Украина, бо ҳисоби 1:2 мағлуб шуда буд. Бозии дуюми санҷишӣ муқобили бошгоҳи «Ауда»-и Латвия бо ҳисоби мусовӣ ва бидуни гол хотима ёфт. «Истиқлол» дар бозии сеюми санҷишӣ аз бошгоҳи «Валмиера», ноиби қаҳрамони Латвия, бо ҳисоби 0:1 мағлуб гардид.
Ба ин тартиб, дастаи «Истиқлол», ки дар доираи ҷамъомади таълимию тамринӣ дар Туркия чаҳор бозии санҷишӣ анҷом дод, дар сетоаш шикаст хӯрда, як бозиро бо натиҷаи мусовӣ ба поён расонид.
Ёдовар мешавем, «Истиқлол» дар марҳилаи гурӯҳии Лигаи қаҳрамонҳои AFC (Конфедератсияи футболи Осиё)-2022 дар гурӯҳи «А» бо тимҳои «Ал-Ҳилол» (Арабистони Саудӣ) ва «Ал-Райян» (Қатар), инчунин ғолиби ҷуфти плей-офф «Шарҷа» (Имороти Муттаҳидаи Араб) – «Ал-Завраа» (Ироқ) рақобат мекунад.
Ҳамаи бозиҳои марҳилаи гурӯҳии Лигаи қаҳрамонҳои AFC-2022 дар минтақаи Ғарб аз 7-ум то 27-уми апрел дар шакли мутамарказ дар Арабистони Саудӣ баргузор мешаванд. Бозиҳо дар шаҳрҳои Ар-Риёз (гурӯҳҳои «А» и «В»), Ҷидда (гурӯҳи «С»), Бурайда (гурӯҳи «D») ва Даммом (гурӯҳи «Е») барпо мегарданд.
Тибқи низомномаи мусобиқот аз рӯи натиҷагирии марҳилаи гурӯҳии Лигаи қаҳрамонҳои AFC ғолибони панҷ гурӯҳ дар ҳар як минтақа, инчунин се дастае, ки дар гурӯҳҳои худ бо натиҷаҳои хубтар ҷойҳои дуюмро ишғол мекунанд, ба даври 1/8 финалӣ роҳ меёбанд.
Дар сурати ба плей-офф роҳ пайдо кардан, «Истиқлол» бозии даври 1/8-ниҳоии Лигаи қаҳрамонҳои AFC-ро рӯзҳои 3-юм ё 4-уми феврали соли 2023 баргузор хоҳад кард.