Дабири кулли Федератсияи футболи Тоҷикистон Давлатманд Исломов комиссари бозии финалии Лигаи қаҳрамонҳои 2021 таъйин шуд. Дар ин бора сомонаи расмии ФФТ хабар медиҳад. Дар финал дастаҳои «Ал-Ҳилол» (Арабистони Саудӣ) ва «Пхохан Стилерс» (Кореяи Ҷанубӣ) санаи 23-юми ноябр дар Варзишгоҳи байналмилалии шоҳ Фаҳди шаҳри Риёз ба ҳам меояд.
Илова бар ин, Давлатманд Исломов ба ҳайси комиссари бозии даври севвуми марҳилаи интихобии Ҷоми ҷаҳони-2022 дар гурӯҳи «А» миёни дастаҳои мунтахаби Ироқу Сурия, ки фардо санаи 11 ноябр баргузор мешавад, даъват шудааст.
