Дар шаҳри Душанбе мусобиқаи навбатии байналмилалӣ таҳти сарпарастии Ассотсиатсияи футболи Осиёи Марказӣ баргузор мешавад. Аз 2 то 8 июл дар Варзишгоҳи марказии пойтахт Чемпионати CAFA-2021 байни духтарони то 17-сола доир мегардад. Панҷ дастаи мунтахаб барои унвони пурқувваттарин тими минтақа мубориза мебаранд. Дар чемпионати CAFA-2021 байни духтарони то 17-сола дастаҳои Тоҷикистон, Эрон, Ӯзбекистон, Қирғизистон ва Афғонистон ширкат меварзанд. Ҳамаи бозиҳои мусобиқа бидуни тамошобин сурат мегиранд. Тибқи низомнома дастаи ғолиб аз рӯи шумораи зиёди имтиёзҳои бадастомада муайян карда мешавад.