Ассотсиатсияи футболи Шоҳигарии Нидерландия (KNVB) тасмим гирифт, ки бозиҳои мавсими 2020/21-ро 12-уми сентябр шуруъ кунад. Ҳамакнун мавсими нави Эредивизи бо бозии дастаҳои "Утрехт" ва “АЗ” оғоз меёбад. Бозиҳои охир, яъне даври 34-уми мусобиқоти мазкур 16-уми майи соли 2021 доир шуда, пас аз он даври плей-офф барои роҳхати Лигаи Аврупо ва рақобатҳои гузаришӣ дар дивизиони бартари кишвар сурат мегиранд. Хотиррасон мекунем, ки мавсими 2019/20-и чемпионати Нидерландия бо сабаби пандемияи коронавирус қабл аз муҳлат анҷом ёфта буд ва қаҳрамони кишвар дар ин мавсим муайян нагардид.