Имшаб бо иштироки дастаҳои “Фламенго”-и Бразилия ва “Ривер Плейт”-и Аргентина дидори ниҳоии Ҷоми Либертадорес сурат гирифт. “Ривер Плейт”, ки қаҳрамони феълии ин мусобиқа маҳсуб мешуд унвони чемпиониро дифоъ карда натавонист. Ҳисоби бозӣ 2 бар 1 ба фоидаи “Фламенго” шуд. Аргентиниҳо бо голи Рафаэл Борре дар дақиқаи 14-ум ба пеш баромаданд. “Фламенго” таслим нашуд. Ҷаҳду такопуи бразилиҳо дар охири бозӣ самар овард. Габриел бо ҷуфтголи худ дар дақиқаҳои 89-ум ва 90+2 ғалабаи тимашро таъмин кард. Ҳамин тавр бошгоҳи “Фламенго” пас аз тақрибан 38 сол дигарбора беҳтарин тими футболии қораи худ шуд.