Бозии аввали даври ҳаштякниҳоии Лигаи чемпионҳо миёни дастаҳои “Байер”-и Леверкузен ва “Арсенал”-и Лондон баргузор гардид. Вохӯрӣ дар варзишгоҳи “Бай-Арена”-и шаҳри Леверкузен сурат гирифта, бо ҳисоби мусовии 1:1 анҷом ёфт. Халил Мелер аз Туркия ба ҳайси довари асосии бозӣ фаъолият намуд.

Ҳисоб дар оғози нимаи дуюм кушода шуд. Дар дақиқаи 46-ум нимҳимоятгари “Байер” Роберт Андрих гол зада, мизбононро ба пеш баровард. Бозигарони “Арсенал” то дақиқаҳои охири бозӣ кӯшиш карданд натиҷаро баробар намоянд. Ниҳоят дар дақиқаи 89-ум ҳамлагари “тӯпчиён” Кай Хавертс зарбаи 11-метраро бомуваффақият иҷро карда, ҳисобро баробар кард.

Қобили зикр аст, ки бозии ҷавобии дастаҳо рӯзи 17-уми март баргузор мешавад. Ин дидор дар варзишгоҳи “Эмирейтс”-и шаҳри Лондон доир мегардад.

Ёдовар мешавем, ки дар марҳилаи плей-офф “Байер”-и Леверкузен аз рӯи ҳисоби умумии ду бозӣ “Олимпиакос”-ро бо натиҷаи 2:0 мағлуб карда буд. “Арсенал” дар марҳилаи умумии мусобиқа 24 имтиёз ба даст оварда, ҷойи аввалро ишғол карда, ба марҳилаи ҳаштякниҳоии мусобиқа мустақим роҳ ёфт.