Дар варзишгоҳи «20-солагии Истиқлолияти Тоҷикистон»-и шаҳри Хуҷанд бозии финалии минтақаи марказии Ҷоми КФО-2022 миёни бошгоҳҳои «Хуҷанд» (Тоҷикистон) ва «Суғдиёна» (Ӯзбекистон) доир шуд. Дар ин вохӯрӣ дастаи “Суғдиёна” тавонист, ки бо ҳисоби 4 бар 0 дастаи “Хуҷанд”-ро шикаст бидиҳад.
Ҳанӯз дар 20 дақиқаи қисми аввалӣ вохӯрӣ футболбози 39 солаи “Суғдиёна” – Ҷасур Ҳасанов тавонист, ки 2 гол ба дарвозаи Шоҳрух Қирғизбоев ба самар расонад.
Шоҳрӯз Норхонов дар дақиқаи 30-юм ва Ҷавоҳир Қаҳрамонов дар дақиқаи 79-ум ба дарвозаи Қирғизбоев 2 голи дигар ба самар расониданд. Футболбозони дастаи “Хуҷанд” имрӯз бисёр бозии заиф нишон доданд ва пас аз ин бохт аз идомаи бозиҳои Ҷоми КФО-2022 маҳрум шуданд. Ёдовар мешавем, ки ғолиби бозии ниҳоии минтақаи марказӣ аз ҷониби КФО 100 ҳазор доллар туҳфа мегирад.