Дастаи «Равшан»-и Кӯлоб аз таъин кардани мутахассиси 58-сола Наҷмиддин Толибов ба симмати сармураббии бошгоҳ расман хабар дод.
Наҷмиддин Толибов дар ин вазифа Ғайраталӣ Мираҳмадовро, ки тими “Равшан”-ро аз Лигаи якум ба Лигаи олӣ баровард ва ба ғалаба дар Ҷоми Тоҷикистон даст ёфт, иваз намуд.
Наҷмиддин Толибов дар гузашта ба ҳайси футболбоз дар дастаҳои номдори “Вахш”-и Қӯрғонтеппа (феълан Бохтар) ва “Регар-ТадАЗ”-и Турсунзода ҳунарнамоӣ кардааст. Бештар аз 10 сол шомили ситоди мураббиёни “Регар-ТадАЗ” буда, пас аз он ба ҳайси сармураббии “Энергетик” (феълан “Барқчӣ”) ва як муддат ҳамчун сармураббии “Регар-ТадАЗ” кору фаъолият намудааст.
Қайд менамоем, ки пас аз анҷоми 16 даври Чемпионати Тоҷикистон миёни дастаҳои Лигаи олӣ тими “Равшан” бо касби 19 имтиёз дар зинаи шашуми ҷадвали умумӣ қарор дорад.