Ҳамлагари дастаи “Манчестер Юнайтед” Криштиану Роналду рӯзи 17 октябр дар маросими супурдани “Тӯби тиллоӣ” дар театри “Шателет”-и Париж ширкат хоҳад кард. Дар ин бора Le Parisien хабар медиҳад. Бори охир ин футболбози 37-солаи португалӣ дар ин чорабинӣ панҷ сол пеш – соли 2017 иштирок карда буд, ки ҳамон вақт охирин бор соҳиби «Тӯби тиллоӣ» шуда буд.
Роналду барандаи панҷкаратаи «Тӯби тиллоӣ» аст. Танҳо Лионел Месси ин ҷоизаро бештар аз ӯ - ҳафт бор гирифтааст. Карим Бензема, ҳамлагари тими “Реал Мадрид”, ки дар мавсими гузашта бо ин даста чаҳор ҷоиза, аз ҷумла қаҳрамонии Испания ва Лигаи қаҳрамонҳоро ба даст овардааст, довталаби аслии ҷоиза дар соли ҷорӣ номида мешавад.
