Натиҷаҳои овоздиҳӣ барои муайян кардани беҳтарин мураббии моҳи декабр дар ПЛР маълум шуданд. Дар натиҷа мутахассиси тоҷик - Игор Черевченко, ки ба ҳайси сармураббии дастаи «Химки» фаъолият мекунад, унвони беҳтарин мураббии моҳи декабрро дар Премйер-Лигаи Россия соҳиб шуд.
Коршиносони ПЛР, MATCH PRIME ва мухлисон мутахассиси 46-соли тоҷикро интихоб карданд. Дар моҳи декабр «Химки» 3 бозӣ доир намудааст. Шогирдони Игор Черевченко дар моҳи ҷорӣ бо дастаҳои ССКА (2:2), «Арсенал» (1:0) ва «Локомотив» (3:2) рақобат намуда, дар як дидор мусовӣ ва дар ду рақобати дигар пирӯз шудаанд.
Дар ҳоли ҳозир дастаи «Химки» бо дарёфти 25 хол дар зинаи 11-уми ҷадвали ПЛР қарор дорад. Хотиррасон мекунем, ки дар моҳи ноябр низ Игор Черевченко беҳтарин мураббии моҳ эълон шуда буд.