Бегоҳии имрӯз дар даври сеюми чемпионати Ассотсиатсияи футболи Осиёи Марказӣ миёни дастаҳои мунтахаби футзали занона тимҳои Тоҷикистон ва Туркманистон ба ҳам меоянд.

Вохӯрии мунтахабҳо дар Қасри теннис ва маҷмааи варзиши обии шаҳри Душанбе доир мешавад. Оғози рақобати дастаҳо соати 19:00 дақиқа буда, тариқи шабакаи “Футбол”  мустақим намоиш дода мешавад. Шореҳ Иномиддин Аҳмадзода аст. 

Туркманистон дар даври аввал бо Қирғизистон мусовӣ ва дар даври дуюм аз Ӯзбекистон бо ҳисоби 3 бар 6 мағлуб шуда буд. Тоҷикистон дар даври аввал озод буда, дар даври дуюм аз Қирғизистон бо ҳисоби 3 бар 0 аз Қирғизистон мағлуб шуда буд.

Қобили зикр аст, ки мунтахаби футзали бонувони Тоҷикистон давоми як моҳ таҳти роҳбарии мутахассиси маҳаллӣ Баҳром Ёрматов ба аввалин мусобиқаи Ассотсиатсияи футболи Осиёи Марказӣ омодагӣ дид. Ёрматов дар ин вазифа мутахассиси эронӣ Мустафо Афшориро иваз карда буд.
Соли гузашта, дар Душанбе дар мусобиқаи мазкур дастаи мунтахаби бонувони Тоҷикистон бадтарин натиҷаро нишон дода, бидуни имтиёз дар зинаи охир маскан гирифта буд. Эрон ғолиб, Ӯзбекистон медалҳои нуқра ва Қирғизистон соҳиби нишонҳои биринҷӣ шуда буданд.
Охирин бозии Тоҷикистон ва Туркманистон соли гузашта дар мусобиқаи CAFA дар даври сеюм ба ҳам омада буданд. Вохӯрии дастаҳо бо ҳисоби 4 бар 1 ба фоидаи дастаи Туркманистон анҷом ёфта буд.

Ёдовар мешавем, ки рӯзи 9-уми феврал дар Қасри теннис ва маҷмааи варзиши обӣ чорумин чемпионати Ассотсиатсияи футболи Осиёи Марказӣ миёни дастаҳои мунтахаби футзали занона оғоз гардид.

Дар ин мусобиқа, ки аз 9 то 16 феврал баргузор мешавад, тимҳои футзали занонаи панҷ кишвар – Тоҷикистон, Эрон, Ӯзбекистон, Қирғизистон ва Туркманистон ширкат доранд. Мусобиқа дар як марҳила баргузор мешавад.

Дастаи Эрон қаҳрамони секаратаи мусобиқаи мазкур маҳсуб мешавад.