Федератсияи футболи Тоҷикистон ба мухлисон барои дастгирии тими миллии Тоҷикистон дар бозиҳо муқобили мунтахабҳои Беларус ва Тимори Шарқӣ изҳори сипос мекунад.
Агар бозии дӯстона бо мунтахаби Беларус 6300 тамошобинро ба варзишгоҳ ҷалб карда бошад, пас дар рақобат муқобили тими миллии Тимори Шарқӣ дар доираи марҳилаи интихобии Ҷоми Осиё-2027 8520 мухлис ҳузур дошт.
Ташаккур ба ҳамаи мухлисоне, ки дар ин ду вохӯрӣ ба варзишгоҳ омада, дастаро дастгирӣ карданд. Мо ба роҳбарони гурӯҳи мухлисони дастаҳои мунтахаби Тоҷикистон – Шуҳрат Шонов ва Муҳриддин Раҷабов ва гурӯҳи мухлисони дастаҳои «Равшан» ва «Истаравшан», ки тамошобинонро дар нишастгоҳҳои шарқии Варзишгоҳи марказии Душанбе ба фаъолӣ даъват намуданд, самимона изҳори сипос мекунем.
Инчунин ташаккур ба роҳбари Ассотсиатсияи блогерони Тоҷикистон Бахтиёр Маҷидов ва ҳамаи блогероне, ки дар саҳифаҳои иҷтимоии худ дастаи моро фаъолона дастгирӣ карданд.