Мунтахаби ҷавонони то 19 солаи Тоҷикистон имрӯз, 6-уми октябр дар Варзишгоҳи марказии шаҳри Душанбе бозии ниҳоии марҳилаи интихобии Чемпионати Осиё-2020-ро бар муқобили тими миллии Сурия баргузор намуд. Дар ин бозӣ шогирдони Зайниддин Раҳимов бо ҳисоби минималии 1:0 пирӯз шуданд. Дар ин майдондорӣ ягона голи пирӯзиоварро Шаҳром Самиев ба самар расонида, пирӯзии мунтахаби кишварро таъмин сохт. Баъди ин муваффақият миллипӯшони ҷавони мо дар гурӯҳ бо касби 9 имтиёз садрнишинанд. Ҳамин тавр мунтахаби ҷавонони то 19 сола солия оянда дар Чемпионати Осиё-2020, ки дар Ӯзбекистон сурат мегирад иштирок мекунанд. Ба чемпионати Осиё байни ҷавонони 19 сола, ки соли оянда дар Ӯзбекистон сурат мегирад ғолибони 11 гурӯҳ ва 4 тим бо нишондоди беҳтарини дуюм роҳ пайдо мекунанд. Ба истиснои гурӯҳи “С” дар 10 гурӯҳи боқимонда бозиҳои марҳилаи муқаддамоти дар оғози моҳи ноябр баргузориаш ба нақша гирифта шудааст.