Ниммуҳофизатгари дастаи мунтахаби Русия ва "Зенит" Далер Кузяев баъди анҷоми бозӣ миёни дастаҳои наврасони Тоҷикистон U-17 ва Туркия U-17 ҳамроҳ бо падараш ба утоқи либосивазкунии футболбозон даромад. Ӯ бозингарони навраси тоҷикро дилбардорӣ намуда, чунин қайд кард: "Бе бохт ғалаба ба даст намеояд. Ба Шумо дар чемпионати ҷаҳон-2019 дар Бразилия барор мехоҳам." Ёдовар мешавем, ки дидори дастаҳои наврасони Тоҷикистону Туркия дар Ҷоми Валентин Гранаткин-2019 бо ҳисоби калони 5:0 ба фоидаи туркҳо ба анҷом расид. Ҳамин тавр футболбозони тоҷик имконияти идома додани рақобатро дар даври нимниҳоӣ аз даст доданд.