Мунтахаби миллии Тоҷикистон таҳти роҳбарии сармураббӣ Игор Ангеловский омодагиро ба бозии дӯстона муқобили мунтахаби Чин оғоз намуд.

 Пас аз як рӯзи истироҳат, ки ба бозигарон баъди анҷоми бозӣ муқобили мунтахаби Фаластин дода шуд, ҳайати мунтахаби Тоҷикистон дар шаҳри Чунтсин ба тамринҳо баргашт.

 Айни ҳол дар ихтиёри сармураббӣ 26 бозигар қарор доранд. Ҳимоятгар Зоир Ҷурабоев, ки дар бозии муқобили Фаластин корти сурх гирифт, дар дидор бо мунтахаби Чин иштирок намекунад ва аллакай қароргоҳи мунтахаби миллиро тарк кардааст.

 Бояд зикр кард, ки бозии дӯстона миёни мунтахабҳои Чин ва Тоҷикистон 6 октябр дар варзишгоҳи «Longxing Football Stadium»-и шаҳри Чунтсин баргузор мешавад. Оғози бозӣ соати 16:35 ба вақти Душанбе аст.